سياسةنظرات مشرقةيهمكم
حوار مع مواطن فلسطيني غزاوي مقيم في غزة السيد طارق البواب
أجرت الحوار علي السوبستاك السيدة عفاف عنيبة
-1 ما هو الإسم و اللقب :
-اسم طارق البواب
عمري 31 سنة
اللقب ابو عماد
-2 عرفنا بعائلتك و المنطقة التي تقيم فيها بغزة ؟
اب لطفلين
عماد كمان 3 ايام بيصير عمرو 3 سنين
و تالا عمرها سنة و نصف تقريبا
-3هل انت نازح و ما هي منطقة النزوح ؟
انا من عائلة البواب و حاليا نازح في منطقة الزوايدة جنوب قطاع غزة
كنت اسكن في شمال غزة منطقة تل الهوا قبل الحرب
-4 تقييمك للهدنة وهل لها آثار إيجابية؟
الهدنة بصراحة خفّت القصف شوي و خلّت الواحد يقدر يتنفس للحظة، بس الوضع لسه صعب كتير. الاحتياجات كبيرة و ما في شي متوفر زي ما لازم. صحيح حسّينا بفرق بسيط، بس التأثير الإيجابي محدود و ما غيّر الواقع اللي إحنا عايشينه بشكل كبير.
-5 كيف عشتم الإبادة الجماعية الوحشية ؟
انا مش عارف كيف طلعنا من سنتين حرب كان عن عشر سنين
من اول يوم بالحرب انقطعت الكهرباء و المية
و حكولنا نترك بيوتنا و ننزح
كنا نفكر راح ننزح شهر او شهرين كحد اقصى و نرجع زي كل حرب
بس المرة هاي الحرب كانت غير
اصلا لما نزحنا اخدنا معنا اواعي بيكفيني لاسبوعين و بعد اسبوعين لقينا الوضع مطول و لازمنا اواعي و اغراض
طيب كيف نشتري ؟
شو نسوي
الرواتب انقطعت بعد اول شهر
من اللحظة الأولى حسّينا إن الحياة انقلبت رأس على عقب
و صار كل شي بدهي يصير معاناة
ندوّر على نقطة مي
نبحث عن شاحن ما في كهربا
و نحاول نعيش يوم بيوم وسط ظروف ما بتنحمل
الخوف كان جزء من اليوم، يعني نصحى على صوت قصف و ننام عليه. الأطفال كانوا يرجفوا من أقل صوت، و الكبار نفسهم ما كان عندهم قدرة يخفّفوا عنهم لأنهم نفسهم كانوا مرعوبين. الوضع الإنساني كان تحت الصفر… لا أكل بكفي، و لا مي، و لا علاج، و كل شي بنحصل عليه بنحصل عليه بالعافية.
التجربة مؤلمة بشكل صعب يوصفه كلام، و إحنا لحد اللحظة لسه عايشين آثارها… في وجوه الناس، في التعب، في البيوت الخراب، و في قلوبنا اللي اتكسرت أكثر من مرة.
انا اتكلم فقط عن عائلتي من 4 اشخاص و عائلتي والدي و والدتي و اخواتي و اخي
خسرنا شققنا في الحرب
و خسرنا مصدر عملنا الرواتب
و فوق كل هذا خسرنا مدخراتنا الي كانت معانا
و حسابتنا
اتجهنا لحملة عشان نحصل على بعض الدعم
لكن الي كان يجي في الحرب كان يروح في الحرب
هلقيت صحينا
طيب كيف بدنا نكمل !
شو نسوي
ايش لازمنا ؟
احنا كنا نضيع مصاري بتيجي على الطحين
و المعلبات !!
و السكر
-6 ما هو انطباعكم تجاه موقف إخوانكم في العقيدة؟
بصراحة إحنا مقدّرين كل حد وقف معنا بدعوة وعارفين انه في ناس كتير حابة تساعد بس بتخاف تكون العائلة مش صحيحة او ما بيوصل الفلوس للناس الصح
او العائلات الصح
و كتير بيتجهو التبرع للمؤسسات
و للاسف المؤسسات غير عادلة في التوزيع
احيانا التمس لها عذر واحيانا لا
-7 كيف تتطلعون إلى المستقبل؟
احنا بنطلع للمستقبل و قلوبنا معلقة بالأمل ثقتنا بالله كبيرة و دايما بنقول ربنا ما بضيّع حد و بنرجو بعد الله إن أهل الخير يوقفو معنا و يسندو حالنا و إن شاء الله بوقفِتهم نرجع نوقف من جديد و نرجّع حياتنا شوي شوي
-8 ما هي نوعية المساعدات التي تحتاجونها؟
بدنا مصاري عشان نكمل كسوة شتوية نكمل نجيب شوادر نكمل نجيب اكل بسط احتيجاتنا
و اسف اني بحكي كلمة مصاري
للاسف هنا اذا بدك تشتري اي شي لازم مصاري
-9 ما هي مطالبكم كفلسطينيين
تأمين حياة كريمة لنا
و الاعتراف بحقوقنا
من يريد التبرع للسيد بواب عليه بالتبرع عبر هذا الرابط و اللهم يتقبل منكم ربنا تعالي :
